Технология әлемі
ЖИ бар, бірақ жұмыс неге азаймайды?
Amazon ЖИ-дің пайдасын жазылған кодтың көлемімен өлшемеуге шақырады. Ал Дрор Полег ЖИ маманды алмастырмаса да, оның жалақысын азайтуы мүмкін дейді.
Amazon: ЖИ-ді көп қолдану жақсы нәтиже деген сөз емес
Amazon инженердің жұмысын тек ЖИ-мен жазылған кодтың көлеміне қарап бағаламауды ұсынады. Маңыздысы — сол код қандай мәселені шешті және клиентке не берді. Компания кей тапсырмаға ЖИ көмектеспейтінін де мойындайды: мұндайда оны қолданбау нашар жұмыс істедің дегенді білдірмейді.
UEFI осалдығы серверге іске қосылған сәтте шабуыл жасауға жол ашады
Компьютерді іске қосатын UEFI бағдарламасын жасауға қолданылатын EDK2 кодынан осалдық табылды. Ол желіден жүктелетін серверде операциялық жүйе ашылмай тұрып зиянды код орындауға мүмкіндік береді. Шабуылшы серверге дәл жүктеліп жатқан сәтте арнайы желілік хабар жібере алуы керек. Тек дискіден жүктелетін компьютерлерге бұл осалдық әсер етпейді.
Күн сәулесін түнде түсіру үшін ғарышқа айна ұшырмақ
Reflect Orbital ғарыштағы айналармен күн сәулесін түнде Жерге бағыттағысы келеді. Алғашқы сынақ серігін ұшыруға рұқсат берілген. Бірақ экологтар мен астрономдар түнгі жарық адамдарға, жануарларға және жұлдыздарды бақылауға кедергі болады деп қарсы шықты. Калифорниядағы көрсетілімде әзірге ғарыш айнасы емес, жердегі қуатты шамдар қолданылған.
Google ЖИ-дің есте сақтауын жақсартатын тәсіл сынады
ЖИ жаңа нәрсе үйренгенде, бұрын меңгергенін ұмытып қалуы мүмкін. Google ұсынған тәсілде модель жаңа ақпарат қабылдауды уақытша тоқтатып, жинаған мәліметімен қосымша жаттығады. Зерттеушілер осы кезеңді «ұйқы» деп атаған. Сынақта модель жаңа тілдерді үйренгенде де, бұрынғы аударма қабілетін сақтаған.
Жұмыс орныңыз сақталса да, жалақыңыз азаюы мүмкін
Дрор Полегтің ойынша, ЖИ маманды алмастырмай-ақ, оның табысын азайта алады. Ол кей жұмысты көп адамға қолжетімді етіп, мамандар арасындағы бәсекені күшейтеді. Автор мұны музыка саласымен салыстырады: музыканттар жоғалған жоқ, бірақ табыстың көбі аздаған жұлдызға тиеді. Басқа салаларда да бірнеше үздік маман көбірек табыс тауып, қалғандарына тұрақты ақша табу қиындауы мүмкін.
Solomon банктерге күмәнді ақша аударымдарын тексеретін ЖИ әзірлеп жатыр
Күмәнді ақша аударымы байқалса, банк маманы ақшаны кім жібергенін, кім алғанын және олардың байланысын бірнеше дереккөзден тексереді. Solomon осы мәліметтерді жинап, талдау жұмысының бір бөлігін автоматтандыруға арналған. Оны банктің өз серверлеріне орнатуға болады, ал соңғы шешімді маман қабылдайды. Команда Astana Hub бағдарламасына қатысып, Қазақстан нарығына шығуға дайындалып жүр.
Peel: Mac қолданбаларын қалдықтарымен бірге өшіретін ашық кодты құрал
Қолданбаны өшіргенде, оның кэші мен баптау файлдары компьютерде қалып қоюы мүмкін. Тегін Peel сол файлдарды тауып, әрқайсысының қолданбаға қандай қатысы бар екенін көрсетеді. Өшіруді өзіңіз таңдайсыз, ал себетті босатқанша файлдарды қайтаруға болады. Құрал macOS 26 және одан кейінгі нұсқаларға арналған.
Миллион жол кодтың орнына 300 жол: Tinfoil тәжірибесі
Tinfoil виртуалды машиналарды іске қосуға арналған миллион жолдық дайын кодты шамамен 300 жол кодпен алмастырды. Қажет жұмыстың көбін машина жүктелген кезде емес, оны алдын ала дайындағанда орындауға көшірді. Осылайша шабуыл жасауға болатын код азайды. Бұл шешім компанияның өз жүйесіне арналған, кез келген компьютерге жарай бермейді.
The Early Access Playbook: өнімді алғашқы қолданушылармен сынау
Адамдар идеяңызды мақтауы мүмкін, бірақ бұл өніміңізді қолданады деген сөз емес. Хитен Шах олардың мәселені қазір қалай шешетінін зерттеп, жаңа өніммен нақты жұмыс істеп көруін бақылауды ұсынады. Бір рет сәтті қолданғаны да жеткіліксіз. Сол қажеттілік қайта туғанда, адам өніміңізге орала ма — маңыздысы осы.
ЖИ-мен код жазу оңайлады, бірақ жұмыс көбейді
ЖИ-мен код жазу жеңілдеген соң, инженер Орестис Иоанну көбірек жобаны қатар бастай берген. Бірақ әр агенттің сұрағына жауап беру, жазған кодын тексеру және тапсырмалар арасында ауысу оны бұрынғыдан көбірек шаршатады. Кодты ЖИ жазғанымен, бәрін түсініп, шешім қабылдау әлі де адамның мойнында.